مرعوبة طول الوقت ان ممكن ييجي يوم اكون فعلا

رسالة من مشتركة معنا
ممكن تنشرو الرسالة من غير اسم ومن فضلكو تبعتولي اللينك....؟
شكرا مقدما
انا بنت, بشهادة ناس كتير ودودة جدا والكلام معايا مفيش اسهل منه, كان عندي صحاب كتير بس اللي اشتغلت واللي اتجوزت واللي سافرت والحياة بتمشي ربنا يبارك لهم.
هواياتي كتيرة وبشغل نفسي بحاجات اكتر بس مش لاقية اللي اشاركها معاهم, اكتشفت اني مفيش اي حاجة مشتركة بيني وبين الناس اللي حواليا سواء صحاب او اهل. عارفين لما تكونو ناجحين اوي في حاجة بس مش لاقيين اللي يفرح معاكو؟ مرعوبة طول الوقت ان ممكن ييجي يوم اكون فعلا لوحدي, لو مت او حصلتلي حاجة محدش هيعرف. انا عايشة في بيت عيلة مع ماما وبابا وهمة الاتنين من مش هتمين يعرفو ايه اهتماماتي, اي حاجة ميكونش ليه علاقة بعريس تبقى تافهة ومالهاش قيمة, اخواتي متجوزين في نفس البيت بس كل واحد ملهي في دنيته, حتى لما بابا وماما سافرو شهر محدش جالي يعبر البني ادمة اللي قاعدة لوحدها دي يشوفها عايشة ولا لأ.
علاقتي بأهل بابا او ماما رسمية جدا لاني عشت في بلد تانية ورجعت كبيرة فامش داخلة وسطهم اوي. بنتقابل في المناسبات والاعياد الرسمية بس وبفضل طول الوقت حاسة اني وسط اغراب, حاولت اندمج وسطهم بس مفيش فايدة, عارفة انه ممكن يكون مثال تافه شوية بس مثلا على الفيس هنا انا ضايفاهم وبلاقيهم بيعلقو في صفح بعض الا عندي, يمكن عشان اهتماماتي غريبة شوية بالنسبة لهم بس والله العظيم بحاول اتواصل معاهم بأي كلام وخلاص بس برده كأني غريبة وسطهم لدرجة اني قربت اقتنع اني نحس, كل ما يبدؤا كلام في موضوع معين واجي اشارك فيه الموضوع يتقفل.
بالله عليكو محدش يقول لي دة ملل من عدم الجواز, اتقدم لي ناس كتير بس محصلش نصيب فقررت اني مفكرش في الموضوع ده واسيبه 100% على ربنا لاني عارفة ان ربنا ليه حكمة في الموضوع ده سواء كان متأخر او ماليش نصيب فيه اصلا.
مش عارفة الدنيا فضيت حواليا كدة امتى وازاي واعمل ايه. عايزة اهل, عايزة عيلة واصحاب افرح وسطها, حد اقول له انا فرحانة تعالى افرح معايا بس مش لاقية خالص.
هوة الموضوع ده صعب اوي كدة؟ انك تلاقي اللي يشاركك اهتمامتك؟ صعب تبقى فيه عيلة تحسسك انك جزء منها؟ صعب يكون فيه اصحاب يستمرو معايا على طول؟
الحمدلله بصلي وبعيط لربنا كتير اوي ولما اخلص بكون تعبانة جدا لدرجة اني ممكن ماحسش بنفسي وانام على المصلية. حاسة ان الناس في دنيتي قليلين جدا لدرجة اني سعات بحس اني بتنفس من خرم ابرة.
اسفة لو كان اسلوبي في الكتابة ملخبط بس انا بعيط على طول ودة اللي عرفت اطلعه من الزحمة اللي جوايا.