هسيب البيت واروح اقعد عند امي

رسالة من مشتركة معانا
انا متزوجه من اربع اشهر وحامل وحملى خطر لوجود ورم كبير وساكنه في شقتي في عمارة والدي ووالدي الله يكرمه ويحفظه ويخليهولنا يارب هو اللي مشطب الشقه بتاعتي من الالف للياء من قبل ما اتجوز ودافع في الجوازه النصف بالظبط واي حاجه بابا بيعملها حتى لغاية دلوقتي بيرفض ياخد فلوس مننا نهائيا.. وانا رفضت اعيش بعيد عن اهلى وشغلي علشان متبهدلش ... وزوجي عارف ربنا الحمد لله و لا انكر انه طيب ولا يبخل عليا بشئ ابدا .. هو بينزلي اجازه الخميس والجمعه لطبيعة شغله وبيبات عند والدته طول ايام الشغل لان شقتنا في مدينه غير المدينه اللي فيها شغله وبيت اهله .. فبسيبه يقعد هناك عندهم ويراعيهم لانهم محتاجينله اكيد ... و بدل ما يسافر كل يوم على الطريق .واهلى بيتحملوا مسئوليتي طول ايام الاسبوع ودايخين معايا عند الدكاتره بسبب مرضي ده. المشكله ان بقاله فتره كده كل ما ينزلي اجازه والله يعمل مشكله من لا مشكله ويخليني اعيط وينكد عليا حتى العيد نزل نكد عليا فيه وخلاص وهو عارف ان نفسيتي سيئه جدا اصلا لخطورة الحمل والولاده على حسب كلام الطبيب . وكل شويه دلوقتي يقولي انا هسيب البيت واروح اقعد عند امي انا غلطان اني قبلت اني اعيش في شقه غير شقتي لان عنده شقته وانا رفضت اعيش هناك فيها .. مع العلم انه فعلا بيعمل خناقه على حاجات تافه جدا ... وكانت المشكله الاساسيه انه عايز يخصص اوضه ثابته في شقتنا لاهله لما ينزلوا عندنا .. قولتله وقت ما ينزلوا احنا هنتصرف ممكن هما يناموا في اوضتنا واحنا ننام ف ايام مكان اليومين دول .. او نعمل اوضه اطفال ويباتوا فيها لغاية ما يبقى عندنا اطفال ويكبروا مش ادامهم اقل من ست سبع سنين مثلا ... رفض الفكره واتهمني اني عايزه امشي كلمتي وان البيت انا اللي بمشيه مش هو .. انا فعلا بدات اتعب منه وافكر ف الانفصال لانه حتى مش مراعي الالم اللي انا فيه بسبب المرض والحمل وبيتخانق معايا على حاجات مش وقتها نهائي. رغم اني سيباه والله طول الاسبوع عندهم ومش بغلس عليه ولا بفرض عليه انه يجيلي كل يوم ... انا اتخنقت لدرجة اني بفكر اجهض البيبي علشان ارتاح ومعرضه حياتي للخطر لان الولاده هتكون خطر زي ما الدكاتره قالولي واقفل الباب ده وارتاح . مش عارفه انا بفكر ليه كده بس فعلا الواحده في الوقت ده بتحتاج زوجها يطبطب عليها ويراعيها ومش بتبقى متحمله اي ضغوط نفسيه عليها. تنصحوني بإيه ..