صرت اخفف زياراتي وصرت اروح كل اسبوعين مرة

رسالة من مشتركة معنا

مرحبا صبايا انا كتير مدايئة من بيت حماي .. انا متزوجة من سنة بدولة غريبة واهلي بعاااااااااد بشوفهم كل سنة مرة.. ومالي حدا بهالبلد غير دار حماي وزوجي بحبني وانا بحبو وكتير بنحن عبعض واغلب الوقت بنطلع عند دار حماي نتسلى لانو مالنا غيرهم .. بس لما بروح هناك حماتي غالبا منيحة معي وحماي مريض بالفرشة الله يشفيه بس بنت حماي الكبيرة مو متزوجة بتكشر بوجهي وبتضل ساكتة وازا حاكيتها مابترد او بتطنش ومابتحترم زوجي الي هو اخوها دايما نازلة فينا انتقادات .. بس سلفاتي ال2 لما يجوا بتصير تأهل وترحب فيهم وتمزح وتضحك معهم وتفتح مواضيع ولما بدهم يروحوا بتترجاهم يقعدوا واحنا بتضل محسستنا انها تعبانة ولازم نقوم نروح ع بيتنا ..مع انهم من نفس البلد وعندهم الف حدا يروحوا عليه مش متلي انا صرت الاحظ هالشي واغار بس كلو كنت اكتمو بقلبي وما ابين اني مقهورة . وقلت لحالي يمكن زهقت منا من كتر ما بنروح ( مع انو مابنروح كتير كل اسبوع مرة ) او يمكن لانو ماعنا ولاد صغار زي سلفاتي تتسلى معهم .. صرت اخفف زياراتي وصرت اروح كل اسبوعين مرة .. برضو ما تغيرت وكل مانروح بتحسسنا انو كل يوم بخلقتها .. صرت احاول اجبلها هدايا اكلات طيبة اتقرب منهم وكانت تحكيلي شكرا زاكي وهي مش دايئتو ويا يتوزع او ينكب بالزبالة !! بطلت اخد اشي معي وصرت احاول اروح واقعد مع حماتي وبس ومع هيك بتضل مكشرة بوجهي وتبص علي من فوق لتحت وانا حساسة وخجولة ما بقدر اشوف حد بيكرهني وما اتأثر .. وهلا انا مخففة زياراتي لالهم عالالالالالاخر صرلي اسبوعين مش رايحة وما بعرف هل هالشي صح ولا غلط انصحوني ارجوكم
بعرف كتير منكم رح يحكيلي شو بدك فيها وطنشيها بس مابقدر اطنشها هي ست كبيرة اكبر من امي (حماتي مخلفتها وهي عمرها 13 سنة) يعني هي وحماتي مبين عليهم خوات .. وهي الي مربية اخوتها هي دكتورة جراحة وعندها اربع عيادات وبتشتغل وبتصرف عالدار يعني ما بقدر اطنشها لانها كبيرة بالعمر ومش رجل كرسي بدارهم
عنجد انصحوني شو اعمل لاني مفرفطة روحي وزهقانة ومابعرف لازم اروح ولا ابعد عنهم وزوجي ما بطلعني مكان وضعنا المادي صعب